聖日耳門佔盡上風

猪拉多纳

利華古遜仲未夠班

法國富豪球會巴黎聖日耳門於歐聯16強首回合作客德甲利華古遜，聖日耳門神鋒伊巴謙莫域今屆分組賽轟入8粒勁到爆無倫，產量僅次於另一癲佬C朗，就算缺少拍檔卡雲尼都冇有怕！利華連拚兩場輸波損士氣，主場一樣唔夠砌，聖日耳門小讓平半，上盤捧得過！

（有線62及202台周三凌晨3時45分直播）
伊巴弗到爆一個夠殺

伊巴謙莫域今屆分組賽轟入8球，當中包括作客安德列治嘅大四喜，現於歐聯射手榜僅落後C朗1粒居次席，狀態超勁！呢位瑞典射手愈踢愈醒神，上場聯賽又轟入靚波，腳風順到冇朋友，淨係佢一個都夠殺有餘。雖則話今戰聖日耳門另一超級射手卡雲尼要養傷，難免令人擔心佢哋嘅攻力會有所削弱。但蘇豪認為卡雲尼同伊巴謙莫域其實唔係咁夾，所以即呢對神級雙塔一齊上陣未必可以發揮最大威力，而且今次客場出戰，用番細細粒嘅箭頭拿維斯打反擊反而係更佳選擇。

另一邊廂利華古遜歇冬後愈踢愈沉，前仗德國盃對乙組凱沙羅頓搏足120分鐘最終爆冷輸波出局，上周於德甲前列對決不敵史浩克04，連續兩場主場砌盡都要輸，體力士氣都受損，今次再於主場出擊，雖然好想爭取領先優勢，但對手太強，贏波有難度。
傑斯寧孫弘民難搵食

此外，利華仲有中場大將安利簡恩今仗要坐波監，守將連拿迪斯及射手戴迪約克又有傷，可能齊齊倦勤，惟有靠晒兩大進攻重心傑斯寧同孫弘民爭取士哥。

德甲近年只得拜仁同多蒙特喺歐戰能有所作為，利華古遜級數所限，去到歐聯戰場只係戥腳貨色，呢場主場受讓一樣冇運行，放心捧聖日耳門上盤啦！
悉尼森姆(利華古遜前鋒)

左腳純熟，擅長喺進攻右路發難，又能墮後策劃，踢法全面，難怪史浩克04早已同佢簽約，來季代替好大機會離隊嘅達斯拿。領隊希比亞上周末對史浩克為免尷尬冇派佢上陣，令佢養精蓄銳踢呢場大戰。
卡比耶(巴黎聖日耳門中場)

冬季轉會窗新加盟，終能如願喺歐聯上陣，冇咗佢紐卡素成績江河日下，證明佢幾咁重要。事實上佢喺中場效率極高，能幫球隊轉守為攻，而且佢嘅罰球或遠程炮亦常有佳作，係經典嘅中場發電機。