歐聯淘汰賽正氣受歡迎

猪拉多纳

歐聯淘汰賽展開，從過往數據顯示，呢項大賽足以獨力帶旺周中投X市場，皆因歐聯知名度高，而且夠正氣，深受賭仔歡迎，全球莊家準備就緒，爭取從中賺取豐厚利潤。由於賽事採取兩回合制，能否晉級，主場一戰極其關鍵，主隊肯定使出渾身解數爭勝，最低限度唔好輸。無獨有偶，今輪四支主隊都受讓，下盤好吸飛。

賽制上小組次名出線嘅球隊，16強首回合先喺主場出擊，佢哋係「二奶仔」難免稍被睇淡，往往受讓。不過，能夠打入歐聯淘汰賽絕非泛泛之輩，尤其係今屆小組次名球隊不乏勁旅，最明顯例子必數曼城，呢支英超富豪兵團人腳鼎盛，主場成績極佳，就算對手係巴塞都未驚過，今仗有得受讓平半，好大程度受過去紀錄影響，畢竟曼城係16強新丁，而巴塞係4屆盟主。
巴塞作客唔谷 曼城受讓着數

以波論波，曼城級數不在巴塞之下，預料巴塞首回合作客亦唔敢谷得太前，唔輸已經有着數，形勢好清晰，因此下盤獲得唔少球迷捧場，雙方攻力強，大盤亦有支持。

另一場巴黎聖日耳門似係秤先少少，但作客利華古遜並唔易踢，始終德國球隊韌力強，估計會係一場拉鋸戰，利華受讓可取。