阿仙奴唔夠仁揪

猪拉多纳

以德制德 呢招唔使得

今晚歐聯16強首回合英超阿仙奴主場對德甲班霸兼衞冕嘅拜仁慕尼黑，十足十一場「德國打吡」。皆因兩軍正選加埋後備，幾乎可以砌出一支完整嘅德國國家隊主力陣容。雖然阿仙奴陣中嘅德國兵奧斯爾、梅迪薩卡同普多斯基熟晒拜仁路數，但整體實力同板櫈深度都不及呢支當世最強勁旅，「以德制德」呢招未必使得，加上兵工廠箭頭基奧特爆出偷食事件影響軍心，相信拜仁可重演上屆16強喺酋長球場輕勝兵工廠一幕，1.65倍客W值捧。

（有線61、64、201及203台周四凌晨3時45分直播）
拜仁強勢挑戰40紀錄

兩軍連續兩屆於16強碰頭，上屆交手各贏一場，拜仁首回合作客先勝3比1，次回合返主場稍嫌輕敵下輸0比2，兩回合計憑作客入球優惠晉級，並一路殺入喺倫敦溫布萊決賽兼捧盃而回。拜仁改由哥迪奧拿執教後，連贏歐超盃及世冠盃，目前喺德國盃亦闖入4強，喺聯賽又放到甩轆，戰績之恐怖令其有望挑戰多達40項紀錄，包括成為首支聯賽不敗奪冠嘅德甲球隊同歐聯改制後首支衞冕冠軍。

由於拜仁喺國內未逢敵手，近期比賽大多寓賽於操，雖然主力列貝利因傷未能隨隊，但佢哋人才濟濟，陣中多名德國國腳如馬里奧葛斯、湯馬士梅拿、拿姆、謝路美保定同門將紐亞，加埋洛賓、文迪蘇傑等超班外援，哥帥契仔堤亞高艾簡達拿傳送更係一針見血，呢個金鑽陣容喺歐洲冇乜球隊頂得佢住，咪忘記後備席仲有傷愈冇耐嘅「小豬」舒韋恩史迪加同卻奧斯兩大德國中場，又有西班牙硬漢查維馬天尼斯等候命，你話幾得人驚。
基奧特醜聞影響軍心　

相比之下，阿仙奴兵源輸足幾條街，雖然奧斯爾嘅加盟令整體實力及信心確比上季有所提升，不過佢哋需要兼顧多條戰線，近兩個月比賽幾乎場場都要搏，唔單止禾確特長抖，艾朗藍斯、華美倫、戴亞比亦因傷倦勤，冇乜人輪換之下搏到殘晒，其中奧斯爾近期狀態麻麻。至於箭頭基奧特早前被爆同內衣名模Celia Kay去酒店偷情，領隊雲格話會內部處理，今仗其位置或被普多斯基取代，或多或少會影響軍心。

另外，佢哋周日剛同利物浦於足總盃惡戰一場，比起上周六踢完聯賽嘅拜仁，體力輸蝕，雖有悍將法米尼復出，但又輪到其中場拍檔阿迪達要坐波監，相信頂唔住拜仁嘅狂轟猛炸，重演上屆「劇本」機會極高，客W有1.65倍咪嫌少。
阿歷士張伯倫(阿仙奴翼鋒)

預計阿仙奴今仗會打反擊戰術，呢位速度飛快嘅英格蘭新星將成邊路一把尖刀，自傷愈後佢狀態弗爆，之前4仗錄得3入球1助攻，阿仙奴近5個士哥粒粒都關佢事，必要時更可客串防中添！
堤亞高艾簡達拿(拜仁慕尼黑中場)

巴西94世盃奪標功臣馬仙奴之子，但球風同硬朗嘅老竇唔同，佢係典型嘅技術流，閱讀球賽能力超強，經常創造致命傳送，又擅於控制比賽節奏，係領隊哥迪奧拿重點栽培嘅中場核心。
歐聯密碼

0:拜仁近4場比賽保持0失球

3:阿仙奴近3次歐聯主場對德甲球隊全敗

6:拜仁由上屆16強首回合作客擊敗阿仙奴起，連續6場歐聯作客全勝

12:阿仙奴前鋒基奧特係今屆賽事越位次數最多球員，共12次

20:阿仙奴對上20次於主場出戰各項盃賽從未出現過和局