阿仙奴黑仔遇拜仁冇計

猪拉多纳

歐聯十六強又有兩場大戰上演，細鬼真係戥阿仙奴唔抵，論季內表現佢哋絕對唔差，只不過今次要硬撼現時歐洲最強球隊拜仁慕尼黑，無論點秤都係唔及對手，雖然「兵工廠」有奧斯爾及梅迪薩卡等德國兵做「間諜」，但踢波始終講整體，拜仁瓣瓣都高過你，真係好惡踢！

哥迪奧拿本季將「巴塞模式」套落拜仁度，最初有人批評同班波格格不入，唔變好過變，但球隊戰績仍然理想，足見佢唔係浪得虛名。拜仁陣容鼎盛，每個位置基本上有兩個人用，即使進攻主力列貝利養傷亦未有嚴重削弱球隊戰鬥力。佢哋攻守都可用唔同組合，哥帥將拿姆改造成防中效果都幾好，班波變化多，令對手防不勝防，實在好難應付。

睇勻今屆歐聯十六強球隊，細鬼都係覺得拜仁最好，呢隊波最犀利係無論對住任何對手都貫徹踢法，不分主客一律照攻，確係好有霸氣。喺度要再一次強調，唔係話阿仙奴唔好，只係對手太強，無論實力同穩定性都係拜仁高啲。「兵工廠」今仗有主場之利，而且仲有得受讓半一，但都係信唔過。
ＡＣ靠唔住冇眼「體」

ＡＣ米蘭今季踢落麻麻地，細鬼覺得隊波內部係有問題，唔知點解巴洛迪利踢親邊隊總會有呢個問題出現，巴神係有質素，但始終麻煩多多，而且經常破壞球隊氣氛，搞事多過貢獻！ＡＣ搵舊將施多夫返嚟係死撐，班球員有質但唔夾，絕不可靠！相比之下，馬體會球員起碼畀人睇到一條心為球隊而戰，即使近況稍有跌Watt，仍然有力反客為主。