足總盃出局休息11日李城叉足電剷平森林

猪拉多纳

今晚除咗歐聯爆發激戰外，英冠亦都有場「升班大戰」備受注目，由榜首李斯特城作客排第5嘅諾定咸森林。雙方同樣保持至少11場聯賽不敗，氣勢旗鼓相當，但考慮到諾定咸森林仍受傷兵問題困擾，睇怕都好難抵擋養精蓄銳嘅李斯特城囉，足智彩開出平手盤，梗係撐1.8倍客軍李斯特城。

（開賽時間：周四凌晨3:45）
兩周4場客戰森林傷兵成籮

諾定咸森林目前以54分排聯賽榜第5位，距離第2位打多一場嘅般尼只有6分差距，弊在球隊衰分心要應付足總盃，周日喺三線各有主力上陣下，作客輸畀英甲嘅錫菲聯，難免打擊士氣。

至攞膽係，佢哋已經喺兩星期內連續踢咗4場作客賽事，體能狀態令人擔心，何況陣中主力如中場蘭斯貝利、守將賀比斯等6件精兵今仗休戰，就算佢哋回師主場亦難秤先。

講番早早喺足總盃出局嘅李斯特城，大戰前足足抖咗11日，須知道英冠同樣冇歇冬假，難得呢班波可以喺季中抖陣再搏殺過，點計都會有着數嘅。既然依家諾定咸森林傷疲盡現，貴為英冠作客王嘅李斯特城實識得把握機會「打落水狗」，以鞏固自己嘅一哥地位。