史雲斯主場受讓有揸「拿」

猪拉多纳

今晚係歐霸盃之夜，史雲斯會喺32強首回合主場出擊惡鬥拿玻里。照睇牌面，「天鵝」梗係唔夠拿玻里高啦，不過看守領隊蒙克寧願放棄足總盃，都要留力撼拿玻里就知佢幾重視呢場波，加埋客軍射手希古恩有傷未必落場，「天鵝」受讓平半下盤博得過吖！

（有線61、201及廣東體育周五凌晨4:05直播）

史雲斯早排炒咗米高盧特立之後，改由中堅蒙克擔任看守領隊，呢位老大哥接掌帥印之後，試過領軍大炒卡迪夫城3蛋，作客去到史篤城亦搶到分，近仗明顯有起色。上場足總盃第5圈（16強）以1:3不敵愛華頓出局，蒙克收起晒大批主力，預期射手韋菲特邦尼、翼鋒尼敦戴亞、中場里安比頓同門將禾姆等主將會悉數重返正選行列，主場出擊唔係冇得鍊。
希古恩或休戰拿玻里唔齊腳

冇錯，拿玻里計人腳同「卡士」都高過史雲斯，弊在首席射手希古恩上仗鬥薩斯索羅場波拉傷背脊，今仗極可能休戰，冇咗呢位喺各項賽事攻入18球嘅阿根廷球星衝鋒陷陣，無疑大大削弱拿玻里嘅火力，況且荷西卡利祖同恩斯治尼都係技術型攻擊球員，面對硬淨到不得了嘅史雲斯守將艾殊利威廉斯同捷高肯定冇啖好食。

再講，拿玻里除咗翼衞辛尼加同中場悍將美斯度仲養緊傷之外，就連費達歷高費南迪斯都要坐波監，前中後三線都唔齊腳，作客去到史雲斯地頭要讓波就更加信唔過，寧博主隊。