鳳凰+1無寶不落

猪拉多纳

水手殘陣輸到慌

今季澳職最令人失望球隊肯定係中岸水手，呢支上季總冠軍錄得三連敗，出現信心危機，隨時連季後賽資格都保唔住。屋漏偏逢連夜雨，水手今仗有三位主將停賽，主場殘陣迎戰威靈頓鳳凰，Mic少認為水手失分機會甚高。鳳凰表現大有進步，有力坐和望贏，何況有得受讓必揀讓球客勝。

（有線64及203台周五下午4時30分直播）

中岸水手由開季至今，演出一直死氣沉沉，近期戰績更急劇插水，連輸三場，現時只係領先第七位威靈頓鳳凰四分，再咁落去遲早跌出前六位，失去季後賽資格。水手今仗面臨人腳危機，因為兩位前鋒麥西蒙、費斯格拉特及後衞祖舒亞路斯一齊「坐波監」，另一位守將賓特格菲斯有傷在身上陣成疑，攻守能力都大為受削，加上以水手近期嘅頹勢，實在難望翻身。
作客戰績唔失禮

威靈頓鳳凰上仗慘吞墨爾本雄心五蛋，好大程度上因為太早失波。其實呢支新西蘭球隊勢頭不俗，由上年12月尾至今，近九仗取得六勝一和兩負，當中四場作客贏咗三場，包括擊敗第二位嘅西悉尼流浪者，擺脫過往「作客蟲」污名。鳳凰經歷上場大敗，職球員應會認真檢討，今仗可望迅速反彈，一於捧讓球客勝。