「真積分榜」挑戰失誤球證

猪拉多纳

世上有好多事無法用常理解釋，好似嚟到今時今日資訊科技發達年代，足球比賽依然故步自封，遲遲唔肯喺裁判執法上引入新科技幫助，國際足協仍然有大批墨守成規主事人，堅持「球證錯誤係比賽一部分」，但大把球隊每年投資數以億計，卻往往因為球證同旁證嘅錯誤，而將成績、前途同「錢」途斷送，黑柴認為球證影響力過大，已經不合時宜。

有呢個諗法嘅唔只黑柴一個，德國著名足球網站 wahretabelle.de 近年已經起革命，自設「真積分榜」（WAHRE TABELLE），佢哋嘅積分榜係扣除咗球證誤判，包括錯判越位與否、枉判十二碼同皮球是否有過白界等冤案，當然包括扣除利華古遜前鋒傑斯寧去年十月作客賀芬咸，頂中網側被判入波嘅著名「幽靈入球」，積分榜同德國足總嘅積分榜幾乎同步更新，但得出嚟嘅結果大不相同。
賀芬咸被屈11分

以今晚慕遜加柏主場對賀芬咸為例，喺德國足總積分榜，慕遜加柏目前得34分排第六，賀芬咸得25分排第十（未計今晨史浩克對緬恩斯成績）；至於「真積分榜」，慕遜加柏同樣係得34分，排第七，但賀芬咸原來應得36分排第五，更勝慕遜加柏，即係話賀芬咸今季經過21場聯賽已經畀球證屈咗11分，實在好唔公平。
作客夠料大起加柏

講番場波，賀芬咸係德甲大盤王，近期狀態亦勇，近三仗聯賽兩勝一和轟入八球，今晚作客一樣照攻。相反慕遜加柏已六場不勝，今晚返主場志切走出低谷亦會攻，雙方都有主力中前場球員復出，捧大盤穩陣。
有線64及203台 周六晚10時30分直播