勝利未回氣益晒阿聯

猪拉多纳

唔少熟朋友都知我妹頭係阿仙奴粉絲，佢哋周中踢歐聯16強，繼上年之後又再輸多次畀拜仁慕尼黑，真係可惜！原本諗住踢少個之下頂住只係輸一球，咁去到安聯球場都仲有得博，但輸埋湯馬士梅拿個頭槌後，妹頭真係唔服輸都唔得！唉，依家惟有希望「教授」雲格次回合可以帶領球隊創造奇迹啦！

剛啱創造奇迹嘅亦有墨爾本勝利，佢哋上周喺亞冠盃外圍賽反勝蒙通聯晉級分組賽。小妹睇番當日精華，雖然勝利攻勢多值得反勝，但論埋門質素，真係慘不忍睹！無論係艾奇湯臣或者杜羅奧斯都有成四、五次「餐士」，但結果一係當龍門個心口係靶心，一係射出界，用「浪射」嚟形容就啱晒！

有份踢亞冠當然有助球會財政，但之後就要舟車勞頓去比賽，對球隊爭取成績未必係好事。好似勝利咁，今日澳職主場對完阿德萊德聯之後，就要起程去廣州同恒大踢亞冠盃分組賽，球員今日點都有留力心態。
阿德萊德聯射手當弗

至於阿德萊德聯方面，佢哋喺最近10場聯賽攞咗21分，可以話係大翻身，若果保持住呢個氣勢，睇嚟季後賽都可以預番個位畀「阿聯」嘞！前車路士球員法比奧費拉拿當然係大功臣，近兩場都有波入，增添咗小妹對佢哋嘅信心，加上作客受讓平半，今日要硬下盤！

（有線64及203台周六下午4時45分直播）
妹頭推介

墨爾本勝利Vs阿德萊德聯

阿德萊德聯（下盤）