曼聯水晶宮入波唔慌多

猪拉多纳

高空攻勢考起RVP 朗尼

曼聯已經3場冇贏過，領隊莫耶斯戰術被轟一成不變，淨係識得兩邊出波。今輪佢哋作客下游球隊水晶宮，後者喺領隊佩利斯帶領下，防守有明顯改善。一隊唔識攻，一隊識得守，1.8倍入球細博得過！

（now621台周日凌晨1:30直播）

進入莫耶斯年代，紅魔變成倚重雙翼嘅球隊，上周賽和富咸2:2場波，全場傳中82次仲破晒歐洲、英超紀錄。不過，呢套戰術就唔多啱一對「魔鋒」尹佩斯（RVP）同朗尼啦！就連荷蘭國家隊領隊尹戈爾都同傳媒講，曼聯套戰術完全唔啱RVP，喺國家隊佢會踢得開心好多。其實尹帥咁講不無道理，頭槌根本唔係RVP強項，你係咁出波畀佢真係盞搞。而兩邊出波同樣令到朗尼冇晒表現，搞到過去5場都冇入波同助攻。不過英國《BBC》尋日報道，朗尼已經落實同曼聯續約5年半，據報周薪亦達30萬鎊，絕對係天價肥約，總算沖喜下。

水晶宮自佩利斯11月上任後13場波，只失咗13球，比之前12場失21球大有進步。如果莫耶斯仲係墨守成規，想要打破水晶宮個龜殼真係一啲都唔易。