奪冠在望拜仁唔使搏 撐漢諾威4倍「讓主」

猪拉多纳

拜仁慕尼黑周中喺歐聯贏出漂亮一仗，作客2:0力挫阿仙奴，今晚佢哋回歸德甲造訪漢諾威，牌面上係高過主隊幾班，不過拜仁家陣喺德甲遙遙領放，所以教練哥迪奧拿未必會畀班球員搏得太盡，以免影響之後嘅「三冠王」日程，今場波一於扒冷，撐受讓嘅漢諾威4倍「讓球主勝」。

（有線61、64、201及203周一凌晨0:30直播）
哥帥：德甲係薄餅歐聯先係大餐

正所謂「無敵是最寂寞」，拜仁依家喺德甲拋離次席嘅利華古遜16分，全隊都坐定粒六，深知捧走「冠軍沙律碟」只係時間問題，依家歐聯戰線重開，相信「哥帥」會將注意力分散落其他盃賽度。更何況，班球員啱啱先喺倫敦惡戰阿仙奴返嚟，無乜必要再喺今場為「大炒」而冒險，況且列貝利仍然養傷，相信拜仁隨時勒住勒住，失分都唔出奇！

賽前哥帥話德甲對佢嚟講只係一件薄餅或者漢堡，歐聯先係餐廳入面嘅大餐，難免有輕視聯賽對手之嫌。漢諾威教練哥古治隨即反擊：「我哋已經準備好薄餅同漢堡，但我保證非常難食！」球會高層杜夫納都話要將拜仁帶入球隊嘅廚房，擺明今仗會盡全力炮製對手。
漢諾威主場僅1敗

雖然漢諾威近兩場聯賽都係作客輸波，但佢哋喺主場嘅成績明顯好過作客好多，今季主場聯賽只係輸過1場啫，踢10場有6勝3和1負，以漢諾威主場嘅韌力，加上拜仁心態上唔想咁搏，主隊要被炒唔係咁易，玩「讓球主勝」絕對划算！
頂占筍盤：漢諾威（讓球主勝）