兩軍各有所求 雄心 獅吼「大」打出手

猪拉多纳

澳職榜首布里斯班獅吼今日下晝造訪包艇嘅墨爾本雄心，表面上睇佢哋要贏波好似冇咩難度，但查實雄心經過季初頹勢後，最近已全面回勇，兩軍實力差距未必有想像中咁大，獅吼想攞足3分未必如願，既然勝負難料，不如轉吼1.75倍入球大好過。

（開賽時間：周日下午2:00）
獅吼作客旺開大

墨爾本雄心季初經歷14場不勝後強勢復勇，近5仗豪奪4勝1和佳績，上場波仲作客以5:0大炒威靈頓鳳凰，打破近一年半嘅作客不勝魔咒，成班波依家信心爆晒棚，重燃季後賽希望，今鋪肯定會食住個勢再搶攻。係，雖然雄心有翼鋒基維爾、守將維拿特缺陣，但好在射手大衞威廉斯狀態勁弗，近3戰轟入5球，為咗趕上季後賽尾班車，就算佢哋今仗面對嘅係聯賽一哥，亦唔到佢哋Hea住守，一定喪攻。

獅吼上仗主場意外輸畀紐卡素噴射機，但班球員嘅發揮都唔算太差，只係埋門一腳仍有待改善。佢哋當務之急，當然係盡快鎖定聯賽冠軍，方便隊波提早輪換休息啦，今仗點睇都唔似會坐以待斃，睇埋佢哋今季嘅作客成績，係10戰有6場開大，既然今仗雙方都有心鬥攻，入波仲點會少先？