熱刺打「雀」局啅硬！

猪拉多纳

熱刺喺上場歐霸盃32強首回合作客烏克蘭嘅迪尼普，領隊舒活收起一班主力，最後輸波收場。今輪佢哋返到英超作客諾域治，艾迪巴約同基爾獲加等主力抖足精神，可以上場搏殺。諾域治近況咁差，又點頂得住養精蓄銳嘅熱刺？熱刺今場讓一球，一於捧3.6倍「讓球客勝」！

（now621台周一凌晨0:00直播）
諾域治遇弱愈弱陷降班漩渦

熱刺依家喺聯賽榜排緊第5位，落後第4嘅利物浦3分，領隊舒活知道最重要係打入下屆歐聯，所以上一場對迪尼普收起晒啲主力。冇去到烏克蘭比賽嘅前鋒艾迪巴約、中場艾朗連儂同後衞基爾獲加等重心球員，今場都可以上陣搏殺。過去兩場聯賽入3球嘅艾迪巴約有得落場梗係好啦，唔通仲靠上場鬧出6碼世紀Miss嘅蘇爾達杜咩？

至於諾域治近期雖然同曼城、紐卡素摸和偷雞攞到一分，但係弊在佢哋對護級分子韋斯咸同卡迪夫城全部輸晒，依家同降班區只係一分之隔，形勢極為險峻。「金絲雀」已經4場不勝，今場對住抖到夠嘅熱刺，呢90分鐘真係有排捱。