伊巴謙 馬度迪托弗 PSG大「圖」殺

猪拉多纳

今晚法甲有圖盧茲主場出戰力求衞冕嘅巴黎聖日耳門（PSG），剛喺歐聯16強首回合作客輕輕鬆鬆慨贈德甲勁旅利華古遜4蛋嘅PSG，今仗鬥近況惡劣嘅中游球隊圖盧茲，為咗保持積分榜領先優勢，呢3分可以話志在必得，2.3倍「讓球客勝」抵捧。

（開賽時間：周日晚9:00）
圖盧茲主場5戰不勝

PSG上仗鬥利華古遜，早喺對手踢少個之前已經遙遙領先3粒，足證實力喺歐洲足壇嚟講已屬一線，返到嚟法甲地頭，當然可以繼續蝦蝦霸霸啦！況且佢哋今季喺法甲只係輸過1次，近兩場入3粒嘅伊巴謙莫域、同埋近兩場表現大勇嘅馬度迪拍住上，要維持近5場有4戰至少入兩粒嘅氣勢，轟散對手真係易過借火。

另邊廂嘅圖盧茲近態麻麻，連埋盃賽近6戰僅錄得1勝，就連早排嘅法國足總盃32強作客第4級聯賽球隊穆蘭都輸波出局，非常羞家，最慘係就算自己地頭出戰，都已經5場未贏過，對住超晒班嘅PSG要破蛋都睇怕有難度，今晚聽畀人炒鑊甘o架喇！