重賽有地利侯城主W送禮

猪拉多纳

周二凌晨有兩場英格蘭足總盃賽事，其中16強重賽由侯城主場對白禮頓，侯城剛於聯賽作客大炒卡迪夫城，球員信心爆晒棚，最重要係佢哋依家護級壓力大減，可以輕裝上陣搏盃賽，主W有1.78倍值得捧場。

（now 621及633周二凌晨3時45分直播）

侯城上次作客白禮頓喺落後一球情況下，憑恩歷克沙保完場前五分鐘建功追和1比1，得以取得重賽機會，睇到佢哋有一定鬥心，唔係Hea踢。領隊布魯士早前批評賽程安排失當，要球隊喺三日內踢完聯賽再戰盃賽，好彩上場佢哋聯賽踢出超水準，作客四球大勝護級對手卡迪夫城，未計周日晚成績，佢哋依家排聯賽榜第十一位，護級壓力大減，暫時唔使擔心留力問題。白禮頓剛於主場不敵韋根，士氣麻麻，而且上次有主場之利守唔到最尾，有點放虎歸山味道，客場出戰更唔樂觀。
錫周三歎「查」求晉級

另一場16強錫周三主場對查爾頓則因上次天氣惡劣而延期，法定時間打和將要擇日重賽。查爾頓現排英冠尾三深陷降班漩渦，現階段應以護級至上，而且佢哋上場英冠爆冷擊敗昆士柏流浪搏得好盡，匆匆作戰體力上唔易應付。留意今場勝方下圈將遇上錫菲聯，錫周三上下好期待能夠喺英足盃痛擊同市宿敵，想達標先要過查爾頓呢關，戰意無需懷疑。