多蒙特「尾後針」威力驚人

猪拉多纳

上周歐聯重開，小弟眼白白睇住利華古遜慘被巴黎聖日耳門蹂躪，球隊「歐聯恐強症」冇改善。好在第二日拜仁順利擊敗阿仙奴，加上法蘭克福喺歐霸盃逼和波圖，上周德甲球隊歐洲賽成績總算合格。嚟緊呢兩晚出戰嘅多蒙特和史浩克04，命運又會點？

上屆歐聯亞軍多蒙特喺「死亡F組」最後一輪完場前一刻，先憑哥斯基奧斯入波贏馬賽出線。球隊今屆11個分組賽入球中，其中5球係最後12分鐘攻入，可見「蜜蜂兵團」喺教練高普調教下，末段發力嘅「尾後針」威力驚人。

多蒙特啱啱喺德甲倒灶吞漢堡３蛋，但球隊德甲爭標無望下，反而有利專心歐聯，今晚高普有望排出最強攻擊組合，相反對手辛尼特因歇冬期停戰兩個幾月，分組賽得6分更係歐聯史上最低分嘅出線球隊，故此「蜜蜂兵團」作客仍可看好。

至於聽晚史浩克主場迎戰皇家馬德里，雙方級數上有明顯差距，分組賽狂入9球嘅C朗拿度更因西甲停賽可以養精蓄銳，就算愛隊史浩克近期後防有改善，皇馬要淨勝兩球都唔難。