廣島啃唔落「北京水餃」

猪拉多纳

廣島三箭想熱食北京水餃？恐怕冇咁易！今日亞冠盃F組廣島主場鬥FC北京，主隊雖略佔上風，但就冇條件話贏就贏，2.05倍「讓客」抵玩。

（now671台周二晚6:00直播）
三箭搞花臣賣湯餃

剛啱捧咗日超盃嘅廣島有個習慣，就係每次亞冠盃主場賽事，都會推出對手當地嘅特色食品，譬如上季對FC首爾係韓式雞湯，對中岸水手係炖澳洲牛肉，今次對FC北京就係湯餃，只係索價300日圓，似乎係鼓勵班Fans幫手吔晒啲「北京水餃」。

呢啲玩意頭嘅花招，好多時都係得啖笑，舊年亞冠盃廣島主場打過北京，都只係0:0收場，今日佢哋真係冇乜本錢一啖吞咗「北京水餃」，一個唔好彩仲可能淥親添。
北京外援各自為戰

其實FC北京往績係着數啲嘅，起碼舊年佢哋兩戰廣島係1勝1和，問題係佢哋今年換咗由前馬體會主帥文沙奴揸旗，呢位仁兄以往帶波冇乜傑出業績，西班牙傳媒知道佢去中超搵食都唔睇好，覺得佢嘅下場話唔埋慘淡過甘馬曹。

文沙奴佢老人家向來鍾意打「433」或者「4231」陣式，比較有攻擊性，但係今次佢非常穩陣，連日响上海集訓都要求北京班人注意中路防守，似乎係擔心輸波多過想贏，而且阿根廷新援巴塔拉又未操起狀態，另兩件鬼格隆、烏塔卡又鍾意單打獨鬥，合作性差，北京想偷雞亦唔係咁容易。呢場亞冠盃F組開鑼戰，隨時和波收場。