諾在其中 : 星光活力可開齋

不死鸟

聽晚八場賽事喺跑馬地舉行，皮亞士紀念盃、法國五月盃同法國賽馬會盃分別編喺第五、七同八場上演。以前可能馬會要求高，就算有人肯出錢，但亦唔係咁易贊助一項盃賽﹔不過，目前經濟環境唔好，可能連馬會亦希望同多啲人合作，從而推廣本地賽馬活動，所以依家一個賽日裏，經常見到唔少錦標賽舉行。

　　上個賽日有位馬圈朋友同筆者講，佢話依家啲錦標多到數唔晒，不過好多都冇乜特色﹔小妹早前亦曾為幾個馬主做專訪，當問到邊場賽事令佢哋最難忘嗰陣，部分馬主回答係某場捧盃嘅賽事，但一時間卻答唔出個盃叫乜名，證明捧盃雖然開心，但係呢場話係盃賽，嗰場又係盃賽，咁輕易就捧盃，搞到好似冇乜特別咁。至於馬迷方面，冇錯盃賽場合各路人馬會特別肉緊，但賽事形勢均勻，要贏錢亦唔係易事哩﹗

　　講番今戰初步心水，其中一匹係出爭第三場四班千二米嘅「星光活力」，呢匹馬上仗跑谷草一千米，排十一檔起步下全程走外疊，入直路仲要拉出大外檔衝，最終後追凌厲跑第三﹔今仗抽得黃金一檔，有權贏馬開齋。

飛將軍人馬合拍

　　另外，第六場三班一哩鍾意「飛將軍」，呢匹馬演出準繩，季內八戰共得兩冠一亞一季，兩場頭馬均由梁家俊經手，足證夠晒合拍。上場初次跑谷草一哩，跟前下輕易取得頭馬，今次人馬再來兼抽排四檔，估計早段應可跟守前列有利位置，隨時再下一城。