皇馬打克由頭帶到尾

猪拉多纳

恃強凌弱 C朗巴利予取予攜

同時間開波另一場歐聯16強首回合上演德西大戰，德甲四哥史浩克04迎戰西甲一哥皇家馬德里，皇馬無論級數同近況都有明顯優勢，今晚極有機會打破多年來作客德甲成績欠佳嘅宿命。不過基於係兩回合賽事，皇馬今場作客贏波已心足，未必會強求大勝，1.4倍客W可視為過關膽，玩單頭黑柴寧取2.05倍「半全場」客客。

（有線62及64台周四凌晨3時45分直播）
三流防線 史浩克有難

史浩克歇冬後表現大有進步，5場德甲錄得4勝1和，並搶番聯賽榜前4位置，防線合共只失2球亦有明顯改善。不過嚟到歐聯面對超強敵人又係另一回事，事實上史浩克中前場雖具歐洲一線實力，但防線只屬3流，重攻輕守踢法往往令佢哋遇強即屈，今屆德甲主場面對拜仁同多蒙特分別輸0比3同1比3，歐聯分組賽遇上車路士兩回合都要吞3蛋，今晚面對狀態同火力比車路士更強嘅皇馬，注定難有運行。

皇馬正處於巔峰狀態，3線作戰強勢挺進，歐聯分組賽6戰入20球成為入球最多球隊，近15場西甲豪取13勝2和佳績，後來居上以3分壓住兩大爭霸勁敵巴塞同馬體會，西班牙盃準決賽兩回合合共以5比0大炒馬體會更顯示超班實力，皇馬絕對係目前除拜仁以外世上最弗嘅球隊，前線以C朗、加里夫巴利兩大天價球星嘅級數，根本唔係祖爾麥迪比同菲臘比辛坦拿之流可以抵擋。
可改寫作客德國劣績

對皇馬嚟講，作客德國向來都係噩夢，佢哋歷來24次歐戰作客對德國球隊只曾1勝，近10次作客更錄得2和8負劣績，不過今場係兩軍史上首次交鋒，以雙方目前狀態同氣勢，皇馬甚有機會打破宿命。何況教練安察洛堤已經解決到皇馬過去喺上半場因唔夠集中而經常先失嘅老毛病，球隊歇冬後於各項賽事踢咗14場比賽，上半場合共僅失過1球，當中有10場半場可以領先對手，近5場正式賽事亦都開半贏全贏，由於客W冇肉食，因此吼「半全場」客客係更佳選擇。
麥斯美亞(史浩克04中場)

史浩克04嘅青訓產品，今季獲傳奇球星魯爾嘅7號波衫，雖然身形細粒，但創造力傳送同後上入楔都非常煞食，屬正宗10號仔，近期仲頻頻有士哥兼助攻。甚至將另一天才新星達斯拿逼到踢邊路。
迪馬利亞(皇家馬德里中場)

今季被迫讓位畀天價飛翼加里夫巴利，主帥安察洛堤決定改造呢位「拚命三郎」，將佢安插喺中路偏左位置，不但要做組織串連，亦要返後助守，讓王牌C朗可無後顧之憂地進攻，戰術作用十分關鍵。
歐聯密碼

2:史浩克近11次對西班牙球隊，錄得2勝4和5負

3:史浩克近4場歐聯，其中3場冇波入

8:皇馬近10場歐聯8次先開紀錄

18:皇馬近25次作客德國球隊輸18次，僅得1勝

20:皇馬於6場分組賽合共轟入20球