車仔掃雷最緊要穩陣

猪拉多纳

師徒對決 魔獸莫帥細不兩立

歐聯16強上演矚目師徒對決，加拉塔沙雷「魔獸」杜奧巴於地獄主場倒戈鬥舊會車路士，將同「老竇」莫連奴於戰場上兵戎相見，賽前佢直言心情好複雜，更開晒聲話今夏想重返車仔，咁多感情瓜葛，點樣集中精神作戰先？而莫帥就話要同愛徒做90分鐘敵人，佢慣於作客大戰擺出穩守陣式專心打反擊，因此今場玩細盤好路！

（有線61及201台周四凌晨3時45分直播）
保持專業 做90分鐘敵人

歐聯16強抽籤結果出爐後，莫連奴隨即Send短訊畀杜奧巴，叫佢好好享受呢個屬於佢嘅時刻，「魔獸」賽前感觸良多：「我冇辦法忘記自己喺車路士做過嘅事，呢間球會喺我生命中永遠有特別嘅位置，但我會盡量保持專業，尊重自己依家着緊嘅戰衣！」佢於車仔8年生涯經歷太多，難怪佢忍唔住向舊會送秋波：「我份約今年夏天就結束，如果莫連奴叫我再上『車』，我一定會認真考慮！」

莫連奴面對愛徒同樣心情複雜：「感覺真係好奇怪，不過我哋好熟杜奧巴，佢落到場冇情講，惟有同佢做住90分鐘敵人啦！」與此同時，加拉塔沙雷進攻中場史奈達亦會同莫帥化友為敵，兩人09至10季度於國際米蘭合作贏得歐聯冠軍，家陣各為其主，都係要等完場先可以敍舊嘞！
主隊力保唔失作客入球

加拉塔沙雷曾於今屆分組賽主場對皇馬大敗1比6，後防曳到嚇死人，意國名帥文仙尼上年9月尾接掌球隊後主力搞好防務，今次對住車仔有機會打「3412」，防守時兩個翼衞當閘使，中場中路就搵施卡克恩安同菲臘比美路掃波，進攻留番畀史奈達同杜奧巴搞掂，以不失作客入球為首要目標。

車仔1月加盟嘅新兵穆罕默德沙拿及尼曼查馬迪今屆打過歐聯，唔符合上陣資格，但球隊現時基本上齊晒腳，中場可用幾個巴西體力王拉美利斯、大衞雷斯同韋利安喪搶，預期今仗中場爭奪好激烈，兩隊都唔易破關，捧細好路。
史奈達(加拉塔沙雷中場)

除咗杜奧巴，呢位荷蘭中場亦曾係莫連奴契仔，亦係09至10年球季國米「三冠王」功臣，佢曾經喺一個頒獎禮上多謝「寸王」嘅支持同鼓勵！今場師徒對決，佢話好了解「老竇」，知道點去爆車。
韋利安(車路士中場)

車仔今夏擊敗熱刺同利物浦，使咗近4億港元搶到呢名巴西飛翼，冇耐佢已經成為中場必然正選。佢跑得又勤力，進攻同防守都好搏，連施治都讚佢喺跑動方面拍住拉美利斯，啱晒莫帥嘅緊迫踢法。
歐聯密碼

1:車路士最近5場歐聯賽事只失1球

2:車仔近4次對土耳其球隊，錄得勝負各2

5:車仔上次作客加拉塔沙雷曾大勝5比0

8:加拉塔沙雷軍8次主場鬥英格蘭球隊，錄得3勝3和2負

14:加拉塔沙雷今屆6場分組賽共失14球