金像神話升浪初現

猪拉多纳

　　今日有轉播賽，又有港澳盃，戲碼幾好，本來但凡周末跑馬，總係平淡少少，呢日算係幾有睇頭。不過，有睇頭唔代表有賭頭，好多場次混亂一片，都唔知會開邊瓣。如果大家都有類似睇法，最佳自保方式就係睇跑馬，買細。

　　第五場四班1400米。「金像神話」之前跑1000米及1200米，表現唔係特別，前次開始跑1400米，已經入Q，上次仲贏埋，阿輝部署好有心機，慢慢等隻馬跑，先至安排在最佳路程出賽，所以，唔好以為贏完1場收手，呢匹馬現階段先至係當打時期，呢股升浪應可繼續維持。

　　同場最惡係得隻1號仔「一馬當先」，未鬥過，真係唔知鹿死誰手，但可以肯定，後駒賠率必會熱好多。

　　第七場三班1200米。「泰山」今季跑兩場都係谷草，唔似蔡約翰一貫部署，始終最有根據都係呢項路程，轉場係為跑而跑，成績唔好，唔使太過在意。連跑兩場後，呢次唔再渡江，終於肯跑在港唯一贏馬路程，由於近績一般，又用田泰安，一定火燒都唔熱，話晒上季仲贏緊「泡泡小子」，實力可見一斑，而抽到2檔起步，亦都會有數。

　　好靚仔1800米添威力

　　第十場二班1800米。「好靚仔」實力未見底，上硬第一班，亦可能有機會染指打，蔡醫生以前有匹「勝威旺」，到今日終於有第二匹，希望佢可以圓夢。好，講番呢匹馬，成個樣係長途材料，今次跑1800米，先至合尺，威力將會更加勁。(陳華棟 資深評馬人)