史篤城擺大個頭阿仙奴搶W不易

猪拉多纳

近期有復甦迹象嘅阿仙奴總算捱過早前嘅魔鬼賽期，不過今夜佢哋嘅對手史篤城今季轉咗風格，絕對唔易應付，預計雙方係鬥攻格局，宜捧大。

（now 622周六晚11時直播）
曉士夠膽遇強照攻

阿仙奴早前連鬥利物浦、曼聯、拜仁等強隊，打到謝晒，中場核心奧斯爾欠缺休息持續低迷，領隊雲格上仗迎戰新特蘭特登畀「大眼仔」抖抖，改用捷克中場路斯基派牌，呢位「小莫札特」唔單止瞻前顧後，更激活幾名中前場拍檔，就算唔出奧斯爾都無損球隊火力。

史篤城今季由曉士執教後，一改以往悶蛋作風，呢位紅魔名宿為史軍注入一種大無畏精神，尤其於主場面對勁旅都夠膽主攻，對住曼聯（2比1）、利物浦（3比5）、車路士（3比2）全部大手交易。

佢哋不但靠中鋒高治嘅高空轟炸，奧地利前鋒阿拿奧杜域來投亦令中前場組織井然有序，兩翼又有快到無倫嘅艾薩迪及奧丹維治，加埋中場悍將查理阿當嘅超勁遠程炮，史篤城嘅進攻瓣數多籮籮，隨時喺阿仙奴防線搵到着數，1.53倍嘅客W冇肉食兼唔多穩，反而1.85倍嘅大盤更啱口胃。