修咸頓遇利物浦預咗合演入球騷

猪拉多纳

利物浦對上兩場英超，一場對榜尾富咸，一場主場對史雲斯，兩隊對紅軍嚟講應該都係Easy job，但結果兩場都係險勝，搞到利迷心情好似坐緊過山車咁，心臟負荷唔嚟，今場佢哋作客修咸頓更加惡踢，而以紅軍近期嘅超強攻力同超弱防守，應該係大盤格。

（now 621周日凌晨1時30分直播）

利迷近排飽食驚風散，先係對富咸見到紅軍一路落後一路追和，最尾由謝拉特喺臨完場射入12碼反勝，跟住上周見到愛隊喺主場領先兩粒嘅情況下畀史雲斯逼和，同「天鵝」大演入球騷，最尾驚險贏4比3，一眾利迷經歷咗兩場驚心動魄嘅賽事，個個都話心臟負荷好大，下次就要準備平安鐘同救心丹喎！

咁講其實一啲都唔誇，依家排第4嘅紅軍冇錯今季確係穩定咗，尤其進攻火力大增，雖然蘇亞雷斯近排深陷入球荒，但有近期弗爆嘅史杜列治幫佢手，再加埋今季「紅軍飛躍進步男」佐敦軒達臣同史達寧，紅軍真係唔驚冇波入。
鋒力強橫防線弱雞

只係佢哋條防線太弱雞，高路托尼、史卡迪爾同丹尼爾艾格冇個畀到人百分之百信心，搞到前面入幾多，後面就失番幾多，今場作客修咸頓，「聖人」首循環作客都贏，今場返主場紅軍更難言穩勝，改捧大盤更明智﹗