狂仁追殺殘兵史浩克

猪拉多纳

德甲重頭戲拜仁慕尼黑主場迎戰史浩克04，呢場傳統大戰嚟到今日已經冇晒競爭性，拜仁係當世最弗最強球隊，主場對住啱啱畀皇馬狂炒，兼傷兵滿營嘅史浩克大炒可期，讓球主客和拜仁讓到兩球都唔過分，推介讓球主勝。
拜仁望三月份提早奪冠

目前嘅拜仁已經不但係史上最強，仲係「地上最狂」，已經去到遇神殺神嘅境界，雖然聯賽已經拋離利華古遜19分，但仍然努力追求新紀錄，每場賽事都唔會輕視對手，除不斷刷新已創下嘅47場不敗紀錄外，只要今晚贏波取得德甲15連勝，即可創下聯賽史上最長連勝紀錄。拜仁攞硬冠軍都唔留力，仲有一個原因係為咗歐聯，基於16強首回合已作客贏阿仙奴兩粒，出線冇乜懸念，佢哋極希望維持連勝，可以趕及三月份內提早封王，到時就可以全副精神應付四月初展開嘅歐聯半準決賽。

拜仁今仗有湯馬士梅拿同列貝利因傷缺陣，不過球隊中前場兵力太強，列貝利缺陣對球隊影響已愈嚟愈細，舒韋恩史迪加上仗已復任正選，今晚會拍住拿姆，一於正副隊長齊任雙防中，佢哋剛周中同下周中都無戰事，過去對親史浩克都冇留手，今晚自然唔會有憐憫之心。
史浩克防線傷兵滿營

史浩克啱啱喺歐聯主場1比6慘敗於皇馬腳下，其實佢哋無論表現同積極性都唔差，可惜陣容頭重腳輕係死症，後防大部分球員都係三流水準，所以遇強即屈，何況球隊目前傷兵滿營，本來已經有內田篤人、艾奧高、卻治賀夫同馬高賀查等防守球員因傷缺陣，中堅菲臘比辛坦拿對皇馬一役亦勇戰休傷今晚唔踢得，左閘哥拉辛拿斯加上一對防中紐斯泰達同奇雲保定，喺對皇馬之後都傳來受傷消息，球隊目前又傷又疲又洩氣，作客面對拜仁難逃再被大炒命運。　
有線61及64台 周日凌晨1時30分直播