QPR開放入球騷博翻身

猪拉多纳

季前相信冇乜人諗過人強馬壯，又有經驗老到嘅夏利列納領軍嘅昆士柏流浪(QPR)依家喺英冠只係排第四，取得直接升班資格嘅機會唔大，近期錄得三連敗，今晚QPR番到主場對列斯聯，冇得再衰，夏利列納一定會下令球員強攻客隊以全取3分，一於就搏下2.1倍嘅大盤喇！

QPR陣中有好多球員都有英超經驗，贊拿斯、羅拔格連、卡蘭積卡、班拿約、李察鄧尼呢啲球員好多睇開英超嘅球迷應該都聽過吓，再加埋啱啱從韋斯咸借得21歲中場新星拉夫摩利臣，陣容理應超班，領隊更係國內有名嘅夏利列納，QPR應該排更高位置，依家排第四全因夏利叔呢位老人家作風保守，往往搞到球隊識守唔識攻，係英冠前六強入波最少嘅球隊，不過夏利叔都知衰，更主動去進攻，故近五次主場全開大盤，每場都有波入，所以話以QPR咁嘅陣容要入波唔難，領隊嘅戰術稍微改一改就得啦！
列斯聯強援添鋒力

至於列斯聯近日亦從新特蘭借得20歲高大中鋒域咸，呢位英格蘭新星潛質優厚，之前新特蘭同利物浦曾為咗佢爭崩頭，就知佢有料到，佢制空能力強之餘，技術亦相當全面，只係喺英超缺乏上陣機會，佢嘅加盟正好可以幫英冠神射手羅斯麥哥馬克減輕負擔，等羅斯麥哥馬克有多啲空位，改善球隊近期攻力疲弱嘅問題。
TVB 301周六晚8時15分直播