國米復甦同羅馬鬥入波

猪拉多纳

今晚意甲好戲碼，羅馬主場對國際米蘭，國米霉咗兩個月後，近期終於有起色，前鋒柏拉斯奧重拾射門鞋，加上中場古亞連續約專心比賽，以及靴蘭尼斯可望復出，一片中興景象，唔可以再睇小佢哋。羅馬爭標仲有機，挾主場彪炳戰績，繼續喪攻。考慮到主W回報低，羅馬讓半一嫌過火，建議揀1.82倍入球大。

羅馬雖然落後榜首祖雲達斯9分，但踢少1場，換言之其實只係比祖記失多6分，爭標並非太悲觀。呢支首都勁旅最大本錢係近乎完美嘅主場表現，聯賽主場12戰取得10勝2和，近4次都淨贏對手3球或以上，勒都勒唔住，唔需要懷疑羅馬入球能力。因此今仗主Ｗ被壓至1.55倍，的確有道理。
靴蘭尼斯羅馬剋星

不過，國米復蘇亦唔可以忽視，之前為人詬病嘅鋒線重現光芒，尤其係首席射手柏拉斯奧打破入球荒，可謂打通進攻經脈。另一個好消息係早前扭計想轉會嘅古亞連決定留効，有佢校炮，攻勢明顯比較流暢。今仗仲有一位好值得留意嘅球員，就係上個月由拉素轉投國米嘅靴蘭尼斯，呢位巴西國腳以往喺首都打吡，多次射破羅馬大門。靴蘭尼斯因傷缺席上仗聯賽，預料可於今場大戰復出搏殺，國米就算贏唔到，但起碼都應該有波入。
TVB 301 周日凌晨3時45分直播