櫻花派科蘭折箭神鋒加盟升晒呢

猪拉多纳

日職今日開鑼喇！首輪妹頭最期待就係直播嘅揭幕戰大阪櫻花主場對廣島三箭，我就睇好櫻花可以打開勝利之門，皆因對呢個地方特別有感情。唔好誤會，只不過我前排去過大阪，喺度除咗有「天守城」城堡超正嘅3D騷，仲有鐵人28大模型……不過，我妹頭梗唔止呢啲原因就睇好櫻花啦！

櫻花羅致科蘭消息絕對震撼整個日職，呢位烏拉圭射手可以話係近年名氣最大嘅外援，有佢加盟隊友都踢得特別有信心。就連櫻花最貴嗰隻季票，都因為咁而首次畀人掃晒，睇出球迷極為「十卜」。櫻花周中喺亞冠盃作客浦項製鐵雖然被逼和1比1，但有柿谷曜一朗先開紀錄，表現唔算差，相信喺嗰場後備上陣嘅科蘭，今日會同柿谷拍檔攻門，到時大家就可以睇到呢位神鋒喺日職嘅歷史性演出喇！
三箭踢得密攰爆

廣島三箭上季後上成功衞冕，真係跌爛全世界眼鏡。佢哋開咧前其實已經連踢超級盃同亞冠盃，周中喺主場同北京國安（足智彩譯FC北京）賽和1比1，加埋今日呢場，已經係近八日踢嘅第三場波，踢得咁密球員唔攰就假。

依家估三箭可唔可以冧莊當然言之尚早，不過佢哋賣走國腳門將西川周作去浦和紅鑽，改用林卓人，我就有好大疑問，後防會唔會冇咁穩呀。想佢負責封死柿谷同科蘭嘅埋門？我就相當唔睇好囉！

（有線61、201及148台周六下午1時直播）
妹頭推介

大阪櫻花Vs廣島三箭

大阪櫻花（上盤）