意軍反擊快唔赦狂牛

猪拉多纳

今晚重量級熱身賽上演兩年前歐國盃決賽翻版，西班牙喺主場再搵意大利拍跳。貴為上屆世盃盟主，「狂牛」近年出戰意大利卻未佔上風，主帥迪保斯基又鍾意趁住熱身賽試陣，況且中堅碧基缺陣令後防不穩，實畀意軍嘅反擊玩殘，仲要讓波梗係捧對家喇。

（now 632周四清晨5時直播）

儘管兩年前歐國盃決賽西班牙曾大炒意大利四粒，但嗰場波意軍過早失波打亂部署，加上莫達受傷又換晒人之下，被迫以寡敵眾導致慘敗，不足為據。事實上，西班牙近6次對住意大利，只係贏得兩場咁大把，就以上年洲際盃準決賽為例，「狂牛」獨步天下嘅tiki taka踢法，完全受制於對方嘅壓迫戰術，搞到得勢不得分，最終要捱到互射12碼先險勝，證明意軍對住「狂牛」確有一手。
西班牙主帥旨在試陣

由於熱身賽贏輸無關痛癢，西班牙主帥迪保斯基最鍾意喺呢啲場合試陣，歸化中鋒迪亞高哥斯達有望首當「鬥牛士」，而佐治高基、辛迪卡索拉、捷西斯拿華斯亦有機會披甲，唔係話佢哋唔好波，不過皇馬、巴塞系核心於國家隊夾慣夾熟，突然改用一些非「皇巴」系球員，演出點都會打折扣。雖然意大利亦有王牌巴洛迪利落選，但佢哋一向擅踢整體戰，新仔拖連奴前鋒恩莫比尼腳風超順，若能上陣必搏甩髀，在大師級中場派路坐鎮派牌，佢哋轉守為攻嘅速度極快，適逢西班牙守衞碧基因傷倦勤，迪帥或改用查維馬天尼斯客串中堅，呢位拜仁球星轉身偏慢，隨時畀意大利嘅突擊有機可乘，「狂牛」仲要讓波確實制唔過，揀有2.7倍分頭嘅讓球客勝喇。