鬥牛新兵打殘意大利

猪拉多纳

新衫版歐國盃決賽 哥斯達Show Time

歐國盃決賽翻版，狂牛新世代登場！今晚西班牙主場鬥意大利，上演2012歐國盃決賽翻版，「狂牛兵團」近3次同「藍衫軍」碰頭都贏波，至差都互射12碼獲勝，擺明剋住佢哋。今次呢支世盃冠軍更換上全新面貌，唔單只同意大利一樣着新波衫，更由一眾年輕球員孭飛，加埋當旺前鋒迪亞高哥斯達首次為西班牙披甲，要搞掂冇咗巴洛迪利同迪羅斯嘅意大利有幾難，捧2.2倍「讓主」啦！

（now632台周四清晨5:00直播）

無可否認，西班牙連奪兩屆歐國盃及世界盃封王嘅核心成員，唔少都已經踏入職業生涯末期，好彩嘅係陣中一班後生仔唔止技術好，大部分亦有豐富大賽經驗，好似拜仁雙星查維馬天尼斯同堤亞高艾簡達拿咁，質素絕對毋庸置疑。
迪亞高哥斯達35戰入27球

不過今場「新衫版歐國盃決戰」最矚目嘅，當然係由巴西「轉會」西班牙、首次入選嘅前鋒迪亞高哥斯達，呢位馬體會射手早前接受西班牙Canal+電視台訪問，話2011年如果唔係「及時」受傷，已經加盟咗一間土耳其球會，所以覺得自己可以留喺馬體會成為今時今日嘅星級前鋒、再入選埋西班牙國家隊，完全係「命運」！好多西班牙傳媒已經事先張揚佢會踢正選主演「狂牛處子戰」，以哥斯達今季上陣35次喪入27球嘅表現，今場分分鐘拎到處子入球添呀！
藍衫軍4連和腦殘缺陣

當然，小妹並唔係覺得意大利水皮，不過要同頂級列強比，就似乎仲有少少距離喇，佢哋近4場國際賽全部和晒，就連對尼日利亞、阿美尼亞呢啲次級對手都贏唔到，近8場更只係得1戰冇失波，過去意大利最出名嘅穩健防守，似乎已經靠唔住。最大鑊嘅係今場防中迪羅斯因紀律問題冇入選，最具威力嘅前鋒巴洛迪利亦有傷踢唔到，前線後防各缺一大將，想唔輸都幾難。
Data King：藍衫軍旺開半場和

‧意大利近4戰均賽和對手，其中3場開出半場和。

‧兩軍近6次對賽，意大利僅得1勝。

‧西班牙近7戰有6場都攻入兩球。
乜都玩錦囊：西班牙歎慢板捧半場細

雖然話今場係世盃熱身賽，但家陣各大歐洲聯賽踢得如火如荼，話班球員會搏甩髀都冇人信。西班牙近4場有3戰開出半場細，加埋一班球員歎慢板，今場分分鐘到下半場先至有嘢睇，1.42倍半場細做過關膽最啱。