愛華頓下盤有計

猪拉多纳

阿仙奴瓣瓣唔老利

今晚英格蘭足總盃8強早場，阿仙奴坐鎮主場迎戰愛華頓。雖然阿仙奴主帥雲格暗示下周中歐聯對拜仁唔會搏，集中火力於國內賽事，但啱啱國際賽又傷埋中場主力韋舒亞，真係愈窮愈見鬼，相反愛華頓「新魔獸」盧卡古復出後逐漸上力，有力搞到兵工廠防線風聲鶴唳，有受讓半一之利，梗係揀下盤。

（now 632周六晚8時45分直播）

由於歐聯16強首回合主場0比2不敵拜仁，嚟緊周中要打次回合，近日阿仙奴主帥雲格就話吸取咗去年分心歐聯，累到喺足總盃遭英冠仔布力般淘汰嘅教訓，今年絕不會重蹈覆轍。

不過，有時啲嘢唔係話你想就做到，佢哋兵源一向都掹掹緊，除咗長期傷兵禾確特及戴亞比外，艾朗藍斯仲未出得，其中場拍檔韋舒亞啱啱代表英格蘭對丹麥嘅熱身賽，遭利物浦中堅丹尼爾艾格剷傷要抖6周，甚至有陰謀論話呢位紅軍守將刻意整傷佢影響阿仙奴爭聯賽錦標，加上中場核心奧斯爾持續低迷，瓣瓣唔老利，想爭晉級睇怕都有心無力。
小魔獸托弗爆廠

阿仙奴號稱英超技術流一哥，首循環主場對愛華頓嗰陣，竟被對方搓到陀陀擰，最終各一言和，證明「拖肥」自主帥馬天尼斯接手後，進行嘅技術改革初見成效，況且早前受傷嘅箭頭盧卡古，上輪對韋斯咸後備復出尾段一箭定江山，足見狀態弗爆，今仗「小魔獸」應會正選搏殺，料可衝散阿仙奴脆弱嘅防線，今仗仲有得受讓半一咁筍，下盤咪錯過。