AC默契差難入烏甸波

猪拉多纳

話女仔擁有天使面孔、魔鬼身材，肯定係褒獎說話，現時AC米蘭同樣集齊天使同魔鬼，可惜就效果一般，「天使」卡卡同「魔鬼」巴洛迪利，季初原本畀人好大期待，可惜兩個夾唔嚟，再加多個「新駙馬」本田圭佑，中前場默契仲差咗，近日入球數字偏低，球隊下周仲有場歐聯16強對馬體里體育會跟尾，今周意甲作客烏甸尼斯睇怕會留力，入球細係首選，讓球主勝亦可取。
吼細同讓球主勝

AC米蘭近排入球能力偏低，一場入三球或以上，已經要數到一月中意大利盃對乙組仔史柏斯亞，卡卡、巴神同本田化學作用不大，近三戰更有兩場顆粒無收，對住任何對手都冇入波把握。烏甸尼斯當然唔係叻仔，但打仔波屯重兵喺後面，搵迪拿達利一個喺前面衝，主場有發揮唔錯，近四仗不敗，今場睇嚟都係縮喺後面等打反擊，相信入波唔會多，烏甸仲有得受讓，可揀埋讓球主勝。
TVB 301周日凌晨1時直播