不來梅悶功細頂紐倫堡

猪拉多纳

德甲護級戰紐倫堡主場迎戰雲達不來梅，主隊當勇但陣容不整，面對死守嘅不來梅讓到半一嫌多，Oliver建議吼2.05倍細盤。

紐倫堡今季開得曳，踢到第8輪聯賽主場慘吞漢堡5蛋後，會方決定解僱德國籍教頭韋辛加，到第10輪對史特加之前聘得荷蘭教頭華碧克接手，華碧克喺荷蘭已出名擅長花少錢組織好球隊，而且崇尚進攻同擅長激勵球員士氣，不過紐倫堡過去廿多年都一直用德國籍教練，球員一時間無法適應佢嘅戰術要求，踢完首循環最終都未嘗一勝。不過好勝嘅華碧克並未認輸，歇冬集訓營努力向球員解釋戰術要求，同時更公開聲稱一日唔贏波就一日都唔剃鬚，結果球隊歇冬後脫胎換骨，6場聯賽贏咗4場，所輸兩場對手係超班嘅拜仁慕尼黑同多蒙特，佢哋亦係今季罕有能夠喺比賽中為拜仁帶嚟好大麻煩嘅球隊。
對下游球隊主守頻得米

紐倫堡今仗主場對不來梅原本值得睇好，可惜陣容不整，除咗贊特拿、馬高斯伊利亞斯、長谷部誠、謝赫特同丹尼爾真錫克養傷外，仲有柏尼爾遜同費拿雙雙停賽，中場發電機清武宏嗣周中舟車勞頓飛咗番日本踢麒麟盃難回氣，讓到半一嫌多。不來梅限米煮限飯，球隊表現欠缺質素，但教頭杜特用悶功幫佢哋攞咗唔少分，尤其對親同級下游隊伍都縮後嚟踢，沉悶戰績包括1比1和史特加、0比0守和弗賴堡、布倫瑞克同法蘭克福，仲有上輪全無創造力咁1比0小勝失準嘅漢堡，今晚作客紐倫堡會重施故技玩死守，吼細盤好過。
Oliver 推介

法蘭克福下盤

4★

慕遜加柏大

3★

紐倫堡細

3★
有線61及201台周日凌晨1時30分直播