風林遇雪災難抗FC東京

猪拉多纳

日職直播戲碼ＦＣ東京主場對甲府風林，風林受到大雪影響備戰，大軍首輪聯賽被迫改於東京國立競技場作賽，今戰賽前仍受雪災打亂操練程序，弱上加弱，難敵ＦＣ東京，捧主勝！

甲府風林位處山梨縣，當地近日落大雪，搞到球場嚴重積雪，連教頭城福浩都要落手落腳剷雪，但情況並無改善，無法於天然草場進行分隊練習戰，被逼去東京主場隔離嗰個人造草場練波，效果差好遠。風林上場鬥鹿島鹿角淨吞四蛋，攻守都唔掂，家陣仲要操唔足，堅唔掂囉！

ＦＣ東京今個新春來港參戰賀歲盃敬陪末席，班波踢落查實唔曳，首周作客柏雷素爾射足14腳，陣上不落下風。中場尾山陽平同米本拓司受傷休戰，但三田啓貴打落都有水準，上場仲有士哥。東京上季主場對甲府風林輕鬆大勝4比1，只要今仗打番正常水準，全取三分機會好高。
三箭主場可破前鋒

頭場廣島三箭主場對川崎前鋒，兩隊嚟緊要踢亞冠盃，論攻守平衡三箭始終做得好啲，開咧戰打硬仗作客砌低實力分子大阪櫻花，壓逼踢法好奏效。川崎前鋒上仗完場前被逼和，後防未能予人信心，結合近兩次作客三箭全敗劣績，都係揀返主勝穩陣！
有線61及201台周六下午2時直播