反璞歸真 好過人才濟濟

猪拉多纳

世界盃已經愈來愈接近，啱啱周中踢咗好多場熱身賽，呢啲戰果自然成為坊間球迷茶餘飯後嘅話題。不過，球迷們如果諗住藉住呢啲戰果就估計一眾球隊喺世界盃奪冠嘅機會，大有可能會出現誤差。Peter認為以熱身賽作為指標去估計球隊喺世界盃嘅機會其實係有問題，因為唔少深謀遠慮嘅主帥，往往喺呢啲賽事都會留力甚至示人以弱，令球迷有所誤會。
爭位踢影響球員心理

英格蘭、法國同巴西呢啲受歡迎嘅球隊，喺前晚嘅熱身賽齊齊贏波，不過巴西嘅對手只係弱旅兼不設防嘅南非，法國同英格蘭都係因為賓施馬同史杜列治把握到機會先順利贏波。講開賓施馬，Peter覺得佢今季打得好好，係因為前線少咗希古恩呢位競爭對手，令佢心理包袱變得冇咁大，成功重拾昔日光芒。Peter認為一隊波某啲位置有時只得一個球員選擇，總好過一個位有兩個質素高嘅球員爭位踢，因為咁樣令主帥唔使太多顧慮，成日諗住用邊個好時，連球員嘅心理都會受到影響，反璞歸真有時真係會好過人才濟濟。

今晚8時45分分別有英超同英足盃上演，英超係西布朗主場對曼聯，英足盃係阿仙奴主場對愛華頓。西布朗同愛華頓兩支被睇低一線嘅球隊同樣係受讓半一，Peter覺得整條2串1下盤都幾和味！
金句：3月頭國際熱身賽 勝負演出何足掛齒