曼聯跌Watt咬唔入西布朗

猪拉多纳

今晚英超早場戲碼，西布朗主場迎戰曼聯，相比同時間開波嘅阿仙奴鬥愛華頓嘅英總8強，觀賞度當然差一截，但從投X角度嚟睇就另一回事。咪睇西布朗護級形勢危危乎，主場出戰連車路士同利物浦都要擺低兩分，今非昔比嘅曼聯無料話贏就贏，捧受讓半一嘅西布朗下盤啱數。

（now621台周六晚8:45直播）
和過車仔 紅軍西布朗主場唔曳

西布朗依家領先新特蘭1分排第17位，但就比「黑貓」多踢1場，隨時跌落降班區，雖然係咁，但睇番佢哋嘅主場表現其實唔太曳，唔止季初和過阿仙奴，近幾場鬥車路士、利物浦同愛華頓幾支前列分子都唔輸蝕，全部開晒「客和」，睇得出後勁唔錯。後衞比利鍾斯腿筋撕裂倦勤，位置由經驗豐富嘅史提芬列特頂替，問題唔大，防守中場耶高比傷愈復出，更令防守力進一步增強。

相反，曼聯上個月除咗受朗尼續約消息刺激，以兩球淨勝水晶宮叫做踢過場好波之外，其餘幾場唔係作客輸畀史篤城，主場畀包艇嘅富咸逼和，就係歐聯淨吞奧林比亞高斯兩蛋，狀態低迷到得人驚。更何況紅魔後衞莊尼伊雲斯同拉菲爾達施華養傷，尹佩斯、艾拉等多名主力又喺周中國際賽搏殺完，連體力都蝕埋，點捧得落手呀！