阿仙奴 愛華頓炮製足總盃入球騷

猪拉多纳

阿仙奴喺季初嘅表現令人眼前一亮，不過嚟到3月初，已經被榜首嘅車路士拋離4分，其實領隊雲格，係咪應該集中火力爭英格蘭足總盃呢？今晚足總盃8強大戰，阿仙奴喺酋長球場迎戰愛華頓，兩隊射手阿歷士張伯倫同盧卡古近排齊齊回勇，相信今晚可以合力炮製唔少入球，預料會上演一場入球騷，一於捧1.8倍入球大啦！
韋舒亞抖6周廠仔索償779萬

「兵工廠」中場核心韋舒亞，喺早兩日代表英格蘭對丹麥嗰陣受傷，賽後證實左腳骨裂，至少要抖6個星期，除咗缺陣今晚場大戰，嚟緊對車路士、熱刺同曼城嘅聯賽亦只能當座上客，嚴重打擊阿仙奴嘅爭標希望，難怪英國《太陽報》爆料話阿仙奴高層，打算向英格蘭足總索償60萬鎊（約779萬港元）啦！

好彩，「兵工廠」件翼鋒阿歷士張伯倫傷愈復出後狀態弗爆，喺2月份取得3個士哥嘅佢，更獲球會頒發每月最佳球員獎添，有佢拍住回勇嘅德國指揮官奧斯爾，鋒力當然靠得住啦！話晒「廠仔」今季14次主場賽事取得10勝3和1負，今鋪對住愛華頓，照計可以射穿對手大門嘅！
張伯倫 盧卡古回勇

愛華頓每次作客都會腳仔軟，對上兩仗造訪勁旅車路士同熱刺，仲連蛋都破唔到添！不幸中之大幸嘅，係王牌前鋒盧卡古上場聯賽對韋斯咸嗰陣傷愈復出，最後關頭更一箭定江山，相信佢今仗依然可以披甲數胡，呢場波要估邊隊贏係難啲o架喇，但兩軍鬥攻斷估入波唔會少啦，球迷都睇得開心吖！