廣島「勝利飯」「大」把貨賣

猪拉多纳

今日係廣島三箭本季日職主場第一擊，對手係攻擊型嘅川崎前鋒，呢支衞冕冠軍自然多搞作，唔單只派成萬支旗吸引Fans打氣，仲賣埋青山敏弘至Like嘅豬扒飯，話要當川崎係炸豬扒咁喎，呢場咁燥熱嘅波，不妨玩1.68倍入球大。

（有線61及201周六早上11:30直播）
主場鬥前鋒例開大

成兩個星期前，廣島曾經喺對北京國安嘅亞冠盃推賣北京餃子，寓意大啖吞咗對手，結果淥親自己贏唔到，到今場聯賽主場揭幕戰，佢哋依然樂此不疲，連環推出中場青山敏弘最鍾意嘅炸豬扒飯，同埋柴崎晃誠至愛嘅三色飯，畀班擁躉買入場歎，青山仲叫呢個做「勝利飯」添。可能見上次啲北京水餃唔多Work，今次廣島仲加碼預告拍過《名偵探柯南》、《Docter-X》幾套電視劇嘅童星本田望結會嚟捧場，而且印製咗一萬支有「全力」字樣嘅旗幟，送畀入場嘅Fans，希望谷行聲勢贏波。

贏唔贏到關鍵始終睇球員落場嘅表現，廣島日超盃、聯賽搭亞冠打咗3場波，班人已經開始上力，傷兵森崎和幸、高萩洋次郎同柏好文都已經復操，中前場好完整，問題係黃錫浩、邊峻範兩個韓國後衞一齊受傷，就令呢支攻擊力唔錯嘅球隊有後顧之憂。

其實川崎前鋒都一樣，佢哋冇改錯名，真係好似得前鋒冇後衞咁，上場日職Head住神戶2:1到尾都要被追和。更重要嘅係，呢兩班波近14年交手28次從未試過0:0收工，近6次响廣島主場對戰仲開出5大1細，冇理由唔博大啫。