澳職悉尼打吡撐流浪者

猪拉多纳

澳職今日上演悉尼打吡，FC悉尼喺主場迎戰排喺榜前列嘅西悉尼流浪者。咁啱得咁蹺兩軍都喺對上一場聯賽輸波，但西悉尼流浪者始終食住「死敵」，今場佢哋仲有主力射手杜米祖歷復出添，就算作客都冇有怕，咁情況下，一於冷冷哋博個3.85倍「讓球客勝」！

（有線64及203周六下午4:45直播）

FC悉尼依家排喺聯賽第6位，但佢哋剩番落嚟嘅賽程都幾惡啃，幾乎隊隊排名都喺佢哋之上，要一路保住個季後賽席位，真係唔易。
迪比亞路表現飄忽

講真，悉尼自從上場輸咗畀中岸水手後，唔少傳媒都質疑王牌球星迪比亞路喺澳職嘅表現。咁又難怪喎，事關呢位意大利老將雖有唔少佳作，但最弊每場波佢大部分時間都係隱咗形呢，所以連帶球隊成績時好時壞囉。數據顯示，FC悉尼今季9次喺先失波嘅情況下，結果都係輸晒，如果今場入局慢，就真係凶多吉少喇！

澳職「二哥」西悉尼流浪者同榜首布里斯班獅吼相差7分，仍然有機會爭做常規賽冠軍，只係佢哋近期要分心踢亞冠盃影響咗表現，好在，據聞主力前鋒杜米祖歷啲傷已經好番晒，今仗可以候命，流浪者鋒力自然大大提升啦！話晒呢班波今季兩次鬥悉尼都贏晒，格食格味濃，今場幾大都捧客隊啦！
頂占筍盤：西悉尼流浪者（讓球客勝）