舊將領軍都冇情講 曼城斬草除根

猪拉多纳

「藍月復仇記」今晚上演！曼城喺上屆足總盃決賽倒灶0:1負韋根，落得四大皆空，今晚喺足總盃8強再遇仇家，梗係還以顏色啦！雖然衞冕嘅韋根家陣由「藍月亮」舊將路斯拿領軍，但戰場上有邊個會念舊情？曼城今場由王牌阿古路攻堅，加埋講明要搵韋根復仇嘅高柏尼鎮守後防，韋根今鋪都係聽吞蛋，就算曼城讓兩球，照捧2.2倍「讓主」！

（now621、633及635台周一凌晨0:05直播）

唔講上屆足總盃決賽失威，曼城近年對住韋根可以話所向無敵，11戰獲得9次勝利，計往績贏晒。小妹覺得曼城今場值得投以信心一票，係佢哋已經擺脫上屆倒灶失盃嘅陰霾，喺早前聯賽盃輕鬆贈韋根5蛋後，決賽對住頑強嘅新特蘭先失1球下亦反勝3:1，隊長高柏尼都話：「上屆足總盃決賽落敗，令我哋決心喺今季做得更好。」擺明今場要有仇報仇啦！
迪斯高有傷 阿古路孭飛

雖然迪斯高有傷在身未必出得，不過主帥比歷連尼已經事先張揚會派阿古路擔任正選箭頭，呢位阿根廷王牌唔止有腳法、有射術，仲非常識賣口乖，佢早兩日先大讚比帥係「人民教頭」識同球員溝通，畀咗好大信心佢哋喎！前線同阿古路拍檔嘅係今季足總盃上陣2場就入3球嘅尼格度，加埋連續2場有波入嘅耶耶托尼後上，要撕破韋根後防照計唔係難事。

曾効力曼城4季嘅路斯拿，家陣帶領韋根有聲有色，佢賽前仲話今次對舊東家勁感動喎！不過講真，對於曼城一班暴發兵團同新帥比歷連尼，分分鐘要睇報紙先知佢係邊位，又點會有面畀吖？
韋根作客防線表現曳

韋根近7次造訪曼城都冇波入，上屆決賽一箭定江山嘅賓屈臣因傷提早收咧，翼鋒馬田韋漢又唔合乎資格上陣，火力大受打擊。況且曼城對住「仇家」必打醒12分精神，既然韋根近5場作客得1場冇失波，今晚隨時輸鑊甘呀！
Data King：阿古路足總盃勁入波

‧阿古路7次為曼城喺足總盃披甲攻入8球。

‧卡林麥馬拿文踢過10場作客嘅足總盃賽事，共攻入5球。

‧韋根近5戰至少攻入兩球。
乜都玩錦囊：藍月亮慢熱吼半場細

曼城贏波雖然可以預期，但睇番佢哋近期擊敗嘅新特蘭、史篤城同車路士，換邊前最多只得1球進帳，就算較早以前5:1大炒熱刺亦係換邊後先發威，顯示班波較慢熱，不妨要埋1.72倍嘅「半場細」啦！