列斯聯當黑畀雷劈

猪拉多纳

英冠今周開快車，屋漏偏逢連夜雨嘅列斯聯主場迎戰雷丁，列斯聯近排頹爆兼黑氣纏身，上場自己地頭艾蘭路球場「漏水」搞到畀保頓大炒1比5，「潛在買家」卡利亞里班主施連奴收購球隊75％股份一事又有可能被截停，列斯聯今場對住雷丁冇甜頭可言，捧受讓嘅客隊喇！

（周三凌晨3時45分開賽）

列斯聯上周六場內外雙重「漏水」，場內上半場被對方前鋒祖美臣先入一粒，喺半場休息時間場邊一個灑水器突然爆咗，漏到一地都係水，比賽爭啲要腰斬，雖然可以繼續踢但班後防喺下半場繼續「漏水」，結果畀保頓輕輕鬆鬆贏5比1，列斯聯球員離場嗰陣仲畀自己粉絲狂噓，真係頹到爆！

另外，之前有傳意甲卡利亞里班主施連奴想入主列斯聯，仲話事成就會炒咗領隊麥達莫，但施連奴能否正式收購列斯聯都成問題，事關早前佢被指逃稅，若然被證實有罪，英賽會就梗係唔會批准交易。依家列斯聯陷入內憂外患，今場仲要對住近六次對碰都贏唔到嘅雷丁，相反雷丁依家要為升班附加賽資格而搏命，一於捧讓球客勝！
吼埋保頓兼米堡細盤

至於啱啱大勝列斯聯嘅保頓，就會作客打比郡，保頓近期大爆發，近三場全勝，今場對住狀態稍為回落嘅打比郡，受讓值捧。另外，上場終於破咗七場入球荒嘅米杜士堡會喺主場對諾定咸森林，米堡始終係一隊守強攻弱嘅球隊，今場都係捧細盤啱數！