巴塞迷魂大法困曼城

猪拉多纳

兩球在手 搓到你傻

今晚歐聯16強次回合重頭戲，巴塞隆拿坐鎮魯營主場再戰曼城。巴塞狀態明顯跌Watt，佢哋又揸住兩球優勢，勢必使出「迷魂大法」，搓住踢睇定先食，曼城就算想谷亦有心無力，半場隨時冇交收，半場和有分頭值博。

（有線61及201台周四凌晨3時45分直播）

巴塞剛於聯賽0比1輸畀護級分子華拉度列，後防甩漏多多，前線冇乜入肉埋門，狀態明顯跌Watt，賽後仲爆出體能教練阿爾蒂米拉與助教保塔索鬧交添，現時大軍一片愁雲慘霧，連會長巴度美奧都坦言衞冕聯賽難度極高。

既然係咁，惟有將注意力放喺歐聯度喇，始終巴塞首回合贏2比0，今仗就算打和或輸1粒都能晉級，自知近況麻麻，主帥馬天奴為求穩穩陣陣，勢必使出巴塞最強嘅「迷魂大法」，利用佢哋獨步天下嘅tiki taka踢法，美斯、沙維、法比加斯等不斷傳波搓到對手團團轉，就算曼城想谷都好難搶到佢哋嘅波。
曼城啞火 吼半場和

儘管早前勇奪聯賽盃，但曼城前幾日喺足總盃8強被剋星韋根爆冷踢出局，主帥比歷連尼特登收起費蘭甸奴、高柏尼等主力，結果留力留出禍，嚴重打擊「藍月亮」士氣。由於比帥首回合輸波後鬧爆球證執法水平，連同領紅嘅中堅迪米捷利斯齊齊停賽，今仗冇得於場邊督師，助教傑特級數爭幾班，對臨場調動必有影響。

況且箭頭阿古路及尼格度傷愈後未操弗，攰到爆嘅迪斯高上仗半空門之下炒高，末段又撞爆頭，三大射手於關鍵時刻啞晒火，另一前鋒祖維迪亦受傷，「藍月亮」冇本錢搶攻，面對穩字行先嘅巴塞，想急都急唔嚟，半場和有2.5倍分頭捧得過。
Player Browser：法比加斯（巴塞中場）

法比加斯今屆自由度極大，既可墮後與沙維控制比賽節奏，適時變身中鋒入楔埋門，加上多番鋪橋搭路為隊友製造殺機，喺王牌美斯傷愈後未弗嘅情況下，呢位萬能老倌成為巴塞嘅動力泉源。
尼格度（曼城前鋒）

雖然尼格度未重拾佳態，但呢位大舊中鋒衝刺力強，擅於接應兩邊傳中搶點，頭槌攻門或二傳亦有一手，係人都知巴塞防守高波一向係死穴，尼格度就算入唔到波，都能搞到佢哋後防風聲鶴唳。
歐聯密碼

1:巴塞中場沙維於今屆比賽傳球790次，有727成功，成功率達92%排第1。

3:曼城今屆3場作客分組賽全勝，共攻入8球。

4:曼城主帥比歷連尼執教生涯22次面對巴塞隆拿只贏過4次。

7:巴塞今季7場主場盃賽全勝，全部都能淨勝至少2球或以上。