美斯唔開心巴塞頭痕 曼城反轉魯營

猪拉多纳

今晚歐聯16強次回合，巴塞隆拿主場硬撼曼城係全城焦點，呢兩支勁旅最近都喺本土賽事失威，雖然巴塞首回合贏2:0，躋身8強樂觀，但啱啱傳出王牌美斯今季踢得唔開心，仲話有機會過檔曼城添，對士氣當然有影響。撞正曼城啱啱喺足總盃8強懶叻留力搞到出局兼出醜，今晚又點會唔做番齣好戲省招牌呀，2.45倍「讓客」抵玩。

（有線61及201、中央5台周四凌晨3:45直播）

巴塞周日凌晨作客0:1輸畀尾三嘅華拉度列，跌到一地都係眼鏡碎。張峰有睇呢場波，踢完國際賽歸隊嘅「南美雙鋒」美斯同尼馬走晒樣，法比加斯又鬼咁多誤傳，有威脅攻勢寥寥無幾，又難怪西班牙傳媒插到體無完膚。
傳馬天奴唔掂法蘭迪保亞頂上

不過最令「巴迷」擔心嘅係，啱啱有報道指美斯今季喺巴塞踢得唔開心影響表現，原因之一係球會唔肯聽佢話簽好兄弟阿古路返嚟，搞到佢心情麻麻。而且上場對華拉度列中堅碧基孭晒鑊，教練馬天奴臨場調動能力又一般，近日仲傳阿積士教練法蘭迪保亞可能頂佢個位添，假若今晚畀曼城先入波，巴塞隨時亂到反轉！

首回合巴塞憑一個問題12碼贏波，可以預期一肚火嘅「藍月亮」今晚去到魯營實唔會客氣，領隊比歷連尼剛啱喺足總盃8強懶叻，無端端收起隊長高柏尼同薩巴列達兩位後防大將，卒之主場1:2輸畀韋根淪為球壇笑柄。
足總盃留力出事(火羅)爆唔衰得

查實「工程師」留力，無非係想喺今場收復失地，雖然今晚佢要停賽唔可以親自領軍，但有高柏尼同大衞施華等主力擔正，有力同態沉嘅巴塞周旋。雖然首回合曼城表現不似預期，但大家咪忘記分組賽階段，曼城主場同樣大敗畀拜仁，但係去到拜仁地頭就贏3:2，今晚創造奇迹晉級唔奇o架！
乜都玩錦囊：巴塞唔驚鬥攻「大」無畏

曼城今仗肯定破釜沉舟主動出擊，由王牌阿古路孭飛，配合上仗打後備嘅大衞施華，有力撕開今非昔比嘅巴塞防線。不過巴塞亦唔驚同對手鬥攻，1.48倍入球大抵博。
Data King：阿古路5破巴塞大門

‧兩軍同樣喺今屆歐聯7戰攻入18球。

‧巴塞主場對英格蘭球隊得15勝11和2負。

‧曼城作客西班牙球隊取得1勝1和3負。

‧曼城射手阿古路以往喺10場西甲比賽 中，5次射破巴塞大門。