恒大強攻橫濱搵中村「復仇」

猪拉多纳

廣州恒大（足智彩譯FC廣州）今日要為國足復仇？恒大今日响亞冠盃G組作客橫濱水手，會方接連推出兩張比賽海報，表現強大爭勝決心，雖然客戰要讓平半，恒大1.75倍上盤依然抵博。

（now671台周三晚6:30直播）

恒大為咗呢場「中日大戰」搞咗兩張海報，一張主題係「虎嘯關東」，用嚟形容「華南虎」恒大去到日本關東地區大發威，呢張海報《on.cc東網》前日已經出咗街，唔知大家有冇睇過？到咗尋日，恒大再有一款「勝心不變，10年不晚」嘅海報面世，主要講2004年亞洲盃決賽，鄭智領軍嘅中國隊以1:3輸畀中村俊輔壓陣嘅日本，今次擺明要報仇雪恨。
穆里奇傷愈隨軍

由賠率上去睇，恒大的確有條件贏波，因為足智彩個客勝已經由初盤2.05倍下調至1.92倍，讓平半低水好正路。而且恒大都有好消息傳嚟，上屆亞冠金靴穆里奇同國腳曾誠、馮瀟霆全部傷愈隨軍，當中速度奇高嘅穆里奇，係日本仔至驚嘅快馬，佢同迪亞文迪、艾傑臣組成嘅鐵三角，今季就剩低佢一個仲未開胡，呢場實會搏命爭取入波。
水手中堅又老又慢

橫濱水手其實攻擊力唔曳，中村俊輔、齋藤學同藤本淳吾組成嘅進攻軸心好強吓，尤其號稱「日本美斯」嘅新進日本國腳齋藤學，近排狀態好弗。不過，水手中堅中澤佑二、栗原勇藏又老又慢，好易畀恒大班快馬玩殘，入埋都唔夠輸。除非今場波學似恒大舊年作客浦和輸2:3咁樣，啲球證幫到出晒面，否則攻強守弱嘅水手，未必頂得住恒大嘅閃電快攻，主場受讓都咪掂。