賓菲加弗爆受讓筍

猪拉多纳

舒活危危乎 熱刺騰騰震

英國北倫敦嗰邊嘅球迷心情近期應該唔多好，「兵工廠」歐聯16強再次出局，熱刺就啱啱喺倫敦打吡大敗畀車路士，最驚「刺迷」要頹多排，事關聽日凌晨歐霸盃16強熱刺喺主場迎戰葡超勁旅賓菲加，客隊實力唔嘢小，近況又弗，都係捧賓菲加下盤穩陣啲！

（有線61及201台周五凌晨4時05分直播）

熱刺今季季初令人有好大期望，買咗「成村」新兵嚟增加實力，點知前任領隊保亞斯喺季中落鑊，接手嘅舒活上任後成績似乎有改善，但其實球隊表現唔算特別標青，球員喺場上始終欠缺化學作用，踢起嚟患得患失，有啲勝仗都係靠個人能力先贏到，到依家都冇一個明確嘅隊形打到出嚟。
熱刺氣氛衰過香港天氣

依家熱刺內部氣氛好似近期香港天氣咁陰陰沉沉，領隊舒活上場帶隊畀車仔大炒後又傳佢連季尾都捱唔到，主席利維會搵其他名牌教頭，畀着我係舒活都心淡喇！球員見到領隊不獲高層力撐，士氣唔多唔少都會受影響，分分鐘諗住「你都做唔長啦，做乜要聽你支笛」。

熱刺喺歐洲賽對過葡萄牙球隊10次，當中5場喺主場都贏晒，今場對賓菲加好似有優勢，不過紀錄就係要用嚟破嘅，賓菲加今季勁弗，依家力壓另外兩大「土豪」士砵亭同波圖排喺葡超榜首，近8場更係全部贏晒，無論士氣、狀態點都好過熱刺，今場仲要受讓平半，真係冇理由唔揀下盤！