甘美奧主場發惡恰舊生

猪拉多纳

南美自由盃聽朝有五場賽事上演，其中巴西球隊甘美奧主場迎戰阿根廷球隊紐維爾舊生。甘美奧主場戰績強勁，加上陣中阿根廷射手巴高斯近期狀態甚佳，面對祖國球隊紐維爾舊生相信絕對唔會手軟。相反紐維爾舊生作客戰績一向甚曳，今仗客場出戰相信更難言惡，一於捧甘美奧主場奏凱。

（周五早上8時15分開賽）

甘美奧月初喺省聯賽連續三場都贏唔到，但值得留意嘅係呢三場波並非主場賽事，可見球隊狀態並冇回落。甘美奧上仗回師自己地頭即以3比1輕取柏蘇芬杜，其中阿根廷射手巴高斯梅開二度表現甚佳，此子今季喺省聯賽已有9球進賬，今仗面對祖家嘅球隊相信會踢得分外肉緊，有望取得入球。甘美奧陣中尚有39歲嘅前巴西國腳薛羅拔圖在陣，其豐富經驗對班波應付自由盃有很大幫助，加上球隊近10仗主場錄得9勝1和，今仗自己地頭出戰有望再下一城。
紐維爾舊生作客死穴

紐維爾舊生雖有一眾國腳級人馬如軒斯、麥斯洛迪古斯、班尼加同查斯古特等名將在陣，但球隊近期表現非常反覆，而且呈主強客弱嘅趨勢，近10仗作客賽事竟然1場都贏唔到，擺明唔識踢作客波。紐維爾舊生今仗作客到主場戰績強勁嘅甘美奧，羸波機會可以話係微乎其微，呢場波都係簡簡單單捧主隊贏波啦！