英超煞星卡度素回歸賓菲加衝散熱刺

猪拉多纳

「英超煞星」侵襲白鹿徑！歐霸盃16強今晚開打，當中賓菲加會喺首回合造訪熱刺，呢支葡超「一哥」已經足足4個月冇輸過波，最重要係撞親英超隊伍都有波入嘅奧斯卡卡度素傷愈回歸，有呢位「英超煞星」搭住「洛迪高孖寶」衝鋒陷陣，熱刺有地利都難逃一敗，賓菲加受讓平半梗係捧1.89倍下盤着數啦！

（有線61及201、廣東體育周五凌晨4:05直播）

由歐聯降格落嚟踢歐霸嘅賓菲加，喺32強以總比數4:0淘汰PAOK晉級盡顯霸氣，呢支葡超勁旅自去年11月開始可謂遇神殺神，至今喺所有賽事總共23場贏足20場，以安達臣雷沙奧同加雷領銜嘅防線近8仗更加冇失波，不過講到最得人驚，始終係賓菲加嘅鋒線。
洛迪高孖寶腳風順

洛迪高利馬同洛迪高摩連奴今季所有賽事已經合力包辦咗24個「士哥」，呢對「洛迪高孖寶」今仗肯定係熱刺後防嘅心腹大患。而據葡萄牙《球報》所講，巴拉圭射手奧斯卡卡度素已經克服背傷，今晚有望擔正，呢位「英超煞星」歷嚟喺歐戰鬥車路士、曼聯、利物浦同愛華頓都有波入，今晚遇着熱刺，睇怕又係時候數胡。

冇錯，熱刺今屆5場歐霸盃主場賽事都贏晒，但查實勝仗只係嚟自第比利斯戴拿模同舒列夫等二打六，老實講未遇到真正考驗。況且丹麥攻擊中場基斯甸艾歷臣仲養緊傷，無疑大大削弱呢支倫敦球隊嘅鋒力，呢個亦係佢哋近兩場本土賽事入得1球嘅主因。
戴臣養傷後防開窿

再講，熱刺上輪英超淨吞車路士4蛋，攻勢雜亂無章之餘，後防連番犯錯更加係致命傷，最弊係隊長戴臣鬥「藍戰士」一戰傷出，今仗未必出得，冇咗呢位定海神針鎮守後防都咪話唔牙煙，仲學人讓波？唔輸都偷笑啦！
Data King：賓菲加近23戰不敗

‧賓菲加近23戰錄20勝3和佳績。

‧熱刺近8仗都開半場細。

‧賓菲加對上8場波保持不失。
乜都玩錦囊：熱刺死火玩入球細

熱刺月頭喺英超主場鬥卡迪夫城贏得1:0，上仗鬥車路士更加係冇腳攻勢有威脅，火力唔太信得過，撞正已經連續8仗保持清白身嘅賓菲加，睇怕今仗唔慌多波入，1.68倍細好路。