國米維羅納拉鋸悶戰

猪拉多纳

國際米蘭教練馬沙利「守」得雲開，呢位昔日「進攻大師」為保帥位，不惜打倒昨日嘅自己，改為採用保守戰術，以犧牲原則，換來成績上揚。無可否認，國米止跌回升，對球隊前景有利，但fans未必睇得開心，呢種悶蛋足球，好易令人瞓着。不過就好有投X價值，事關國際米蘭今晚作客對近期死火嘅維羅納，預料又係一場拉鋸戰，1.93倍入球細值博。

國米季初大踢進攻足球，叫好又叫座，但之後無以為繼，今年首6場賽事都贏唔到，馬沙利乾脆改踢保守足球，一領先即縮，即使對包尾嘅薩斯索羅，亦只係小勝1比0，上仗又「煲魚生粥」成功，贏拖連奴1粒。

至於維羅納本屬意甲「大」戶，但近兩仗都食白果，其實可以理解，畢竟首席射手東尼已經接近37歲，難以每場都保持水準。進攻中場佐真奴費路1月轉投拿玻里，球隊少咗一大破門板斧，單靠東尼一人之力，恐怕難以喺嚴密嘅國米防線搵到着數。　
TVB 301 周日凌晨3時45分直播