車路士玩輪換鬥維拉小勝格

猪拉多纳

英超兩大「後上王」今晚正面交鋒，阿士東維拉會喺主場恭候車路士。「藍戰士」嚟緊周中要喺歐聯出擊，領隊莫連奴極可能派遣林柏特同舒賀爾尼等副選兵落場，當中「林伯」係就係有「維拉殺手」之稱，但相信今仗對住後勁唔錯嘅維拉未必贏得輕鬆，不如博呢支英超「一哥」小勝，敲3.3倍「讓和」。

（now621台周日凌晨1:30直播）

之所以話兩隊係「後上王」，皆因佢哋係今季英超喺落後情況下搶到最多分嘅球隊，車路士搶到14分排第1，維拉連同上仗反勝諾域治4:1之後，今季就已經先落後跟住後上搶到13分，證明雙方韌力同後勁都唔講得笑，不過講到戰鬥力同人腳，始終係「藍戰士」勝一籌，何況件車仔借將賴恩貝特蘭仲依例唔准出添。
費托受傷收起伊度奧

車路士自從上年12月中就開行Turbo，打後14場英超錄11勝3和佳績，呢支聯賽「一哥」禮拜三凌晨會同加拉塔沙雷進行歐聯16強次回合關鍵戰，以「寸王」莫連奴嘅作風，今仗一定會以輪換制畀部分主力休息。西班牙射手費蘭度托利斯鼠蹊受傷未必披甲，「老人家」伊度奧照計會喺歐聯戰場先搏殺，今晚好可能由上仗鬥熱刺省兩粒嘅丹巴巴亞擔正，再配合德國翼鋒舒賀爾尼衝鋒陷陣。
尅星林伯13度破維拉大門

至於林柏特亦大有機會正選落場，「林伯」最鍾意恰維拉，歷嚟面對咁多支英超隊伍入面，佢對住維拉就最多波入，足足入咗13球，話唔埋今晚又係靠呢位「維拉殺手」數胡。況且維拉今季英超主場僅錄得4勝2和8負成績，車路士去到維拉公園根本唔使驚。

大家有印象嘅話，應該記得車路士上季主場曾經大炒維拉8蛋，但亨格比利覺得呢個場面唔會重演，畢竟今季首循環維拉作客輸畀「藍戰士」1:2場波好唔抵，伊雲洛域開（月爭）打賓迪基同埋泰利禁區內犯手球都逃過球證法眼，維拉今仗肯定加多兩錢肉緊復仇，對住有歐聯後顧憂慮嘅車路士，就算輸都唔會輸得太肉酸。
Data King：藍戰士往績贏條街

‧維拉自2011年8月起，從未試過喺英超連贏兩場主場賽事。

‧雙方近4次交手車路士全勝。

‧車路士連開6口半場細。
乜都玩錦囊：首球吼實伊雲洛域

車路士下周中要喺歐聯出戰加拉塔沙雷，今場波肯定想速戰速決，盡快攞到領先優勢，首入當然要向「藍戰士」埋手。伊雲洛域今季唔止一次後上建奇功，呢位出擊型右閘歷嚟7次喺英超鬥維拉總共入咗4球，首入當然要吼實佢。