曼城捉「老虎」「大」陣仗！

猪拉多纳

「億萬大軍」曼城今季曾經有段時間好風光，仲晨咁早打破「過百大關」紀錄添，所以外界一致睇好佢哋有機會成就「4冠」霸業。不過踏入2月後，曼城班球員明顯跌晒Watt，繼上星期倒灶輸畀韋根同足總盃擦身而過後，周中又喺歐聯16強輸多次畀巴塞，一星期內唔見兩隻盃！不過Yennie相信「藍月亮」球員始終有一定質素，肯定會化悲憤為力量，今晚同近況大勇嘅侯城正面交鋒，預料會上演一場入球騷，呢場「雙城會」，一於捧1.72倍入球大！
耶耶 拿斯尼近6仗包辦6球

曼城最近嘅表現真係差強人意，最大原因係3位前鋒阿古路、尼格度同迪斯高齊齊死火！佢哋3個近8仗都冇波入，入球荒已經維持咗足足成個月，最慘係阿古路對巴塞場波因傷退下火線，真係輸波又輸人。

好彩，曼城一眾中場球星嘅入球能力不嬲都信得過，「後上王」耶耶托尼同「助攻王」拿斯尼，近6仗就合力包辦6個「士哥」，適逢球隊4日內連環喺兩項盃賽Game Over，家陣梗係要集中火力喺聯賽搶分啦，今晚就算冇阿古路，都肯定會搶錢咁搶，攻到侯城甩轆！

「老虎」侯城最近「隊如其名」，踢到虎虎生威，啱啱喺足總盃8強仲大勝新特蘭3:1，將會進軍溫布萊同錫菲聯爭入決賽，士氣肯定旺盛。
侯城喪入波勁弗

最令Yennie意外嘅，係「老虎」中堅居迪斯戴維斯近排弗到漏，已經連續3場比賽有「士哥」，今晚返到自己地頭話唔埋又發威，加埋「老虎」最近4場波全部開大，呢排咁入得，點可以唔追多場大呢？