巴塞老鼠拉龜吼半細

猪拉多纳

奧沙早段好力氣頂得住

美斯做唔成打工皇帝？早前巴塞揚言要讓王牌美斯成為世界最高人工足球員，但有傳雙方傾唔掂數，勢必影響球王嘅比賽心情，況且上周中歐聯贏曼城耗力不少回唔切氣，今晚西甲主場迎戰立心死守嘅奧沙辛拿，初段未必咬得入佢哋，半場細值得捧場。

（now 632周一凌晨零時直播）
美斯續約傾唔掂數

去年皇馬死敵C朗以1800萬歐元年薪榮升球壇打工皇帝，美斯梗係唔服喇，巴塞會長巴度美奧曾大派定心丸，稱今夏會為美斯準備一份世界冧巴溫波糧新合約，點知巴度美奧近日轉晒口風，強調佢哋同美斯仲有合約，唔使咁急傾續約。《馬卡報》大爆猛料，話美斯嘅要求與巴塞開出嘅條件，合約總值相差高達4500萬歐元，甚至希望呢位射手終止依家代言嘅土耳其航空，因為該隊官方贊助係卡塔爾航空，一來一回令佢收入變相減少，導致雙方傾唔掂數，你話冇影響佢心情就假嘅。
歐聯耗力多要回氣

上周中歐聯16強次回合淘汰曼城嘅神級表現，證明美斯喺巴塞仍無可替代，現時續約單嘢搞到一鑊粥，隨時令佢於場上心不在焉。睇番上仗擊敗曼城之役，巴塞眾將都搏得幾盡，按照主帥馬天奴慣例必定作出輪換，中場三核沙維、恩尼斯達、法比加斯今仗必有一人抖抖，勢必影響進攻嘅流暢度。

雖然奧沙辛拿並非好貨色，但佢哋深陷降班漩渦要努力搶分，當然作客魯營球場一定防守行先，該隊對上13場作客比賽，有10場開半場細，可見奧沙初段有氣有力下特別硬淨，適逢巴塞未回得切氣，實搞到對方老鼠拉龜冇碇埋手，半場唔慌多波入，半場細有2.1倍咪嫌少。